Будынак былой мужчынскай гімназіі — помнік архітэктуры класіцызму. Узведзены ў 1809 годзе на цэнтральнай вуліцы горада. З'яўляецца помнікам рэспубліканскага значэння.

У 1789 годзе ў Магілёве адкрылі Галоўнае народнае вучылішча. 15 верасня 1809 года магілёўскае Галоўнае народнае вучылішча ператварылі ў мужчынскую гімназію. Яна размясцілася ў трох старых будынках, якія належалі гораду. У канцы лета 1830 года гімназію перасялілі ў будынак, які да гэтага займалі вайскоўцы. Разам з ёй у гэтых жа памяшканнях размясцілася павятовае вучылішча і ланкастэрская школа. Вучні і настаўнікі гімназіі падтрымалі паўстанне 1863–1864 гадоў. У выніку гімназію часова закрылі, частку настаўнікаў звольнілі, частку арыштавалі. Новы дырэктар гімназіі ўзмацніў нагляд за вучнямі.

З 1 лютага 1919 года былая Магілёўская губернская мужчынская гімназія пачала называцца Магілёўскай савецкай школай. У перадваенны савецкі час школа некалькі разоў змяняла мову навучання: да 1926 года яна была рускай, з 1926 года па 1938 год – яўрэйскай, у 1938–1941 – беларускай, але вялікую частку прадметаў усё адно выкладалі па-руску.

Падчас нямецкай акупацыі школа працягнула сваю дзейнасць, аднак пад назвай “Народная школа № 3” і ў іншым будынку, бо ранейшы будынак аддалі пад казарму і перасылачны пункт. У ходзе ваенных дзеянняў гэты будынак моцна пацярпеў. Да 1949 года школьны будынак цалкам адрамантавалі. З 1956 года ў школе пачалося сумеснае навучанне хлопчыкаў і дзяўчынак. У 1963 годзе пабудавалі новы школьны будынак, а ў 1983 годзе да яго дабудавалі яшчэ адзін корпус. У 1991 годзе рашэннем Магілёўскага абласнога выканаўчага камітэта школе зноў надалі статус гімназіі.

Дата публікацыі: 01.10.2021.

---

Для зручнай навігацыі па славутасцях выкарыстайце БЯСПЛАТНУЮ мабільную праграму