Віцебск. Віцебскі абласны краязнаўчы музей


Other, krokapp.comhttps://krokapp.by/media/

Віцебскі абласны краязнаўчы музей размешчаны ў будынку былой гарадской ратушы па вул. Леніна, д. 36

Музей у Віцебску быў заснаваны 12 лістапада 1918 года загадам Віцебскага губернскага аддзела народнай асветы. Ён быў размешчаны ў будынку былой духоўнай семінарыі і адчынены для наведвальнікаў у маі 1919 года. 19 лістапада 1924 года Саўнаркамам БССР была прынята пастанова аб стварэнні Віцебскага аддзялення Беларускага дзяржаўнага музея. Музей размясціўся ў будынку былой гарадской ратушы. Першыя экспазіцыі для наведвальнікаў адчыніліся 27 красавіка 1925 года.

Музей шматразова змяняў назвы: у 1918—1924 гадах — Віцебскі губернскі музей; 1924—1929 гадах — Віцебскае аддзяленне Беларускага дзяржаўнага музея; 1929—1932 гадах — Віцебскі культурна-гістарычны музей; 1932—1937 гадах — Віцебскі сацыяльна-гістарычны музей; 1939—1941 гадах — Віцебскі абласны дзяржаўны гістарычны музей; 1947—1951 гадах — Віцебскі абласны гісторыка-краязнаўчы музей. Сучасная назва "Віцебскі абласны краязнаўчы музей" усталявалася з 1951 года.

Падчас Другой сусветнай вайны частка калекцый Віцебскага абласнога музея была пагружана ў вагон разам з фондамі Мастацкай галерэі Юдэля Пэна і эвакуіравана ў Саратаў.

На сёння ў фондах музея знаходзяцца матэрыялы археалагічных раскопак на Віцебшчыне (вырабы з крэменю, косці, рога, скураны абутак ХІІ—ХІІІ стагоддзяў, берасцяная грамата ХІІІ—XІV стагоддзяў, пісалы, упрыгожанні са шкла, сердаліку, бурштыну, кераміка ляпная і ганчарная). Таксама ёсць калекцыі натуральна-навуковыя, нумізматыкі, сфрагістыкі, парцэляну, зброі, старадрукаваныя кнігі XVII—XVIII стагоддзяў, прылады працы і прадметы побыту XVIII—XX стагоддзяў, асабістыя фонды гісторыкаў і краязнаўцаў Антона Брадоўскага, Аляксея Сапунова і Вацлава Федаровіча.

У музеі захоўваюцца матэрыялы аб дзейнасці палітычных партый на Віцебшчыне, падзей рэвалюцыі 1905—1907 гадоў, Лютаўскай і Кастрычніцкай рэвалюцый (1917 год). Адмысловае месца займаюць матэрыялы аб Вялікай Айчыннай вайне. Гэта экспанаты аб дзейнасці Віцебскага падпольнага абкама Камуністычнай партыі Беларусі, Віцебскага, Аршанскага, Лепельскага падполля, Обальскай, Прошкаўскай, Асінторфскай падпольных арганізацый, аб вызваленні вобласці ад нямецкіх акупантаў у 1944 годзе. Партызанскі рух на Віцебшчыне прадстаўлены партызанскімі ўлёткамі, газетамі, зброяй, узнагародамі і асабістымі рэчамі Міная Шмырова, Уладзіміра Лабанка, Данілы Райцева, Аляксея Данукалава.


Для зручнай навігацыі па славутасцях выкарыстайце БЯСПЛАТНУЮ мабільную праграму

Спампаваць Спампаваць