Гродна. Стары замак


Other, krokapp.comhttps://krokapp.by/media/

Адным з найважнейшых гістарычных помнікаў Гродна з’яўляецца Стары замак, які знаходзіцца на вуліцы Замкавай. Размешчаны ён у маляўнічым месцы на беразе Нёмана.

Першыя ўпамінанні пра Стары замак датуюцца ХІ стагоддзем, калі было пабудавана абарончае драўлянае збудаванне. Пасля пажару 1398 года вялікі князь Вітаўт на яго месцы загадаў узвесці гатычны пяцівежавы замак. У 1579 годзе па распараджэнні караля і вялікага князя Стэфана Баторыя замак быў перабудаваны ў рэнесансны палац і стаў каралеўскай рэзідэнцыяй. У сярэдзіне XVII стагоддзя замак моцна пацярпеў ад расійскіх войск падчас вайны 1654–1667 гадоў. Аднак дзякуючы намаганням гарадзенскага старасты Крыштапа Жыгімонта Паца быў адбудаваны.

У 1708 годзе ў час Вялікай паўночнай вайны замак быў спалены шведамі, а ў 1729 годзе ў Старым замку прайшла чарговая рэканструкцыя.

У ХІХ стагоддзі, пасля далучэння Беларусі да Расійскай імперыі, Стары замак быў ператвораны ў царскія казармы. Таксама тут былі размешчаны гатэль, афіцэрскае казіно і ваенная бібліятэка. У 1924 г. будынак Старога замка быў перададзены музею. Сёння таксама тут знаходзіцца шмат экспанатаў гісторыка-археалагічнага музея.

У 2015 годзе былі пачаты работы, якія прадугледжваюць правядзенне рэканструкцыі будынка. Згодна з планам, замку павінна быць вернута гістарычнае аблічча, уласцівае будынку ў часы кіравання Стэфана Баторыя.


Для зручнай навігацыі па славутасцях выкарыстайце БЯСПЛАТНУЮ мабільную праграму

Спампаваць Спампаваць