Адзін з галоўных храмаў хрысціян веры евангельскай на Гомельшчыне.

Будынак царквы “Благадаць” у Гомелі архітэктурна нагадвае аб'ект грамадзянскага будаўніцтва. Гісторыя гэтай царквы, якой наканавана было на пэўны перыяд стаць галоўным храмам пяцідзясятнікаў Гомельшчыны, пачалася ў 90-я гады ХХ стагоддзя.

У сакавіку 1993 года кіраўнік музычнага евангелізацыйнага гурта “Галгофа” з Пінска Валерый Бойка, сумесна з пастарам Яўгенам Сергіеням правялі першае набажэнства. А ўжо 11 ліпеня 1993 года першыя 15 членаў новаўтворанай Гомельскай царквы хрысціян веры евангельскай прынялі воднае хрышчэнне на рацэ Сож. 23 верасня 1993 года царква атрымала дзяржаўную рэгістрацыю.

Са снежня 1998 года Гомельская царква “Благадаць” пачынае будаваць уласны дом малітвы, для чаго набывае надзел зямлі з незавершаным будынкам. У 2001 годзе ў новапабудаваным доме малітвы было зарэгістравана Аб'яднанне цэркваў хрысціян веры евангельскай у Гомельскай вобласці. Іншымі словамі, храм стаў галоўным царкоўным будынкам ХВЕ на Гомельшчыне.

У 2004 годзе пастара “Благадаці” Яўгена Сергіёню абралі епіскапам цэркваў ХВЕ па Гомельскай вобласці. Сёння царква “Благадаць” працягвае несці сваё хрысціянскае служэнне ў Гомелі.

Дата публікацыі: 20.12.2021.

---

Для зручнай навігацыі па славутасцях выкарыстайце БЯСПЛАТНУЮ мабільную праграму