Мінская царква “Благадаць” – галоўны храм Аб’яднанай Царквы хрысціян веры евангельскай у Беларусі. Будынак быў узведзены ў 1996 годзе і з’яўляецца адным з найбуйнейшых хрысціянскіх храмаў сталіцы, у якім адначасова можа размясціцца больш за 3000 чалавек. Побач з будынкам царквы размясціліся навучальныя і жылыя памяшканні Тэалагічнага інстытута хрысціян веры евангельскай.

Царква “Благадаць” у Мінску ўваходзіць у склад Аб’яднанай Царквы хрысціян веры евангельскай у Беларусі. Абшчына існуе больш за 30 гадоў. На сёння царква налічвае больш за дзве з паловай тысячы дарослых вернікаў і паўтары тысячы дзяцей. У сучасны момант наведванне храма з’яўляецца адкрытым і даступным. Аднак у савецкі перыяд дзейнасць евангельскай царквы была напаўзабаронена. З-за гэтага ў 1984 годзе Савет па справах рэлігійных культаў пры Саўміне БССР зняў з рэгістрацыі Першую мінскую царкву хрысціян веры евангельскай. Царква сышла ў падполле і 2 гады змагалася за вяртанне рэгістрацыі. На той момант яна складалася з 632 вернікаў. У незалежнай Беларусі ўсе абмежаванні былі знятыя і царква была зарэгістравана пад назвай “Благадаць”. На сёння Мінская царква ХВЕ “Благадаць” – самая вялікая пратэстанцкая царква Беларусі.

На адрасе Гурскага, 48 таксама размешчаны Тэалагічны інстытут хрысціян веры евангельскай – духоўная навучальная ўстанова, якая рыхтуе служыцеляў для Евангельскай Царквы Беларусі. На сёння ў Тэалагічным інстытуце навучаецца 470 студэнтаў і магістрантаў. На базе інстытута праводзяцца розныя мерапрыемствы, у тым ліку і навуковыя гістарычныя канферэнцыі з удзелам навукоўцаў найбуйнейшых ВНУ Беларусі і замежжа.

 

 

Дата публікацыі: 10.02.2020.

---

Для зручнай навігацыі па славутасцях выкарыстайце БЯСПЛАТНУЮ мабільную праграму